Psa 87 | Vulgate_HebPs | STEP | canticum carminis filiorum Core victori per chorum ad praecinendum eruditionis Eman Ezraitae

Psalms 87

1 canticum carminis filiorum Core victori per chorum ad praecinendum eruditionis Eman Ezraitae 2 Domine Deus salutis meae per diem clamavi in nocte coram te 3 ingrediatur ante te oratio mea inclina aurem tuam ad laudationem meam 4 quia repleta est malis anima mea et vita mea ad infernum descendit 5 reputatus sum cum descendentibus lacum factus sum quasi homo invalidus 6 inter mortuos liber sicut interfecti et dormientes in sepulchro quorum non recordaris amplius et qui a manu tua abscisi sunt 7 posuisti me in lacu novissimo in tenebris in profundis [ (Psalms 87:8) super me confirmatus est furor tuus et cunctis fluctibus tuis adflixisti me semper ] [ (Psalms 87:9) longe fecisti notos meos a me posuisti me abominationem eis clausum et non prodeuntem ] [ (Psalms 87:10) oculus meus infirmatus est ab adflictione invocavi te Domine tota die expandi ad te palmas meas ] [ (Psalms 87:11) numquid mortuis facies mirabilia aut gigantes surgent et confitebuntur tibi semper ] [ (Psalms 87:12) numquid narrabitur in sepulchro misericordia tua et veritas tua in perditione ] [ (Psalms 87:13) numquid noscentur in tenebris mirabilia tua et iustitia tua in terra quae oblivioni tradita est ] [ (Psalms 87:14) ego autem ad te Domine clamavi et mane oratio mea praeveniet te ] [ (Psalms 87:15) quare Domine abicis animam meam abscondis faciem tuam a me ] [ (Psalms 87:16) pauper ego et aerumnosus ab adulescentia portavi furorem tuum et conturbatus sum ] [ (Psalms 87:17) per me transierunt irae tuae terrores tui oppresserunt me ] [ (Psalms 87:18) circumdederunt me quasi aquae tota die vallaverunt me pariter ] [ (Psalms 87:19) longe fecisti a me amicum et sodalem notos meos abstulisti ]